நிராகரிப்பு

துயர் கவிந்த வளை பாதை
சறுக்கி வீழ்ந்து
மடிந்தேன்
உன் நிராகரிப்பில்

அடம்பன் கொடி திரண்ட ஞாபக கூந்தல் நீண்டு
மரண வாசம் ஒன்றை
அறை முுக்க நிறைத்து வைத்திருக்கிறது
ஒப்புக்கு எனினும் ஒன்றையும் மீதம்
வைக்காமல்
நிவர்த்தி செய்கிறாய் உன்னுடைய எல்லா தேவைகளையும்

களைந்து பின் உடுத்திக்கொள்ளும்
ஆடை ஒன்றின்
வியர்வை வாசம் கமர்ந்தெழுகிறது
நீ மீதம் வைத்த
இறுதி அணைப்பில்

மரணத்தின் முதல் சொட்டு கரு அறையில் கூடி கசிந்தது
குருதி மணக்கும்
பச்சை உடலோடு
அழுதபடி ஜனித்தோம்
உலகம் வேண்டாம் என்ற
அழு குரல் அது

ஆழி மதக்கும் சருகில்
எழுதிய சொற்கள்
என இறுகிய அணைப்பிலிருந்து
பிரிந்து நிற்கிறாய் நடு காட்டில்

மரணம் நிரப்பிய
மாம்ச கோப்பைகளில் நிறைகிறது நீ நிராகரித்த அச் சிறு கணம்


- ஸமான்